Dánial Hoydal er føroyskur rithøvundur og týðari. Hann er føddur 14. juni 1976 í Tórshavn og hevur lisið retorikk og informatikk á lærda háskúlanum í Keypmannahavn. Hann starvast dagliga sum sjálvstøður ráðgevi innan samskifti og marknaðarføring.
Hann hevur týtt sangleikirnar: Godspell (Tebelak & Schwartz), Eystein & Arnhild (Blak & Kastborg), Jósef og ótrúliga litfagra dreymakotið (Lloyd Webber & Rice), Søgan um ein soldát (Stravinsky & Ramuz), FAME (Fernandez, Levy & Margoshes) og Hair (MacDermot, Ragni & Rado). Allir hava verið framførdir á føroyskum pallum.
Av upprunaverkum hevur hann skrivað tekstin til fyrstu føroysku operaina, Í Óðamansgarði, sum Sunleif Rasmussen gjørdi tónleikin til. Hann skrivaði eisini tekstin til Ólavsøkukantatuna, sum í 2000 varð framførd á 1000 ára haldinum fyri kristnan Føroya. Hann skrivaði tekstin til sangleikin Audition, sum hann gjørdi saman við tónaskaldinum Tróndi Bogasyni. Harumframt handritið til leikin Í geyma, sum bygdi á barnabókina við sama navni, ið kom út í 2002.
Barnabókin Í geyma bleiv útgivin av nýggjum í 2024 í øktari útgávu. Í 2021 kom barnabókin Abbi og eg og abbi út, ið fekk Barnamentanarheiðursløn Tórshavnar býráðs 2022 og Barna- og ungdómsbókmentavirðisløn Útnorðurráðsins 2022, umframt at hon var í uppskoti til Barna- og ungdómsbókmentavirðisløn Norðurlandaráðsins í 2022. Eisini hevur hann skrivað søgur og yrkingar í søvnum og tíðarritum.
Útgávur:
2001 Í geyma
2006 Eygað í Svartideyði og aðrar spøkilsissøgur
2007 Seks yrkingar í Vencil 2
2021 Abbi og eg og abbi
2022 Strikurnar
2024 Í geyma, 2. økt útgáva
Ummæli/umrøða:
Uni L. Hansen: Legg tær´"Í Geyma" í geyma. Dimmalætting. Skái. 16.mars 2001
Vígdis Bjarnadóttir: Í geyma. Fregnir 31.05. 2002
Mortan Ólason Vang: Í geyma - tekstslag, skaldsligar snildir, sjónarhorn og móttakarar í Nýggj leiti, Sprotin 2013
Heiður:
2023 Í uppskoti til Barna- og ungdómsbókmentavirðisløn Norðurlandaráðsins fyri Strikurnar
2022 Barnamentanarheiðursløn Tórshavnar býráðs fyri Abbi og eg og abbi
2022 Barna- og ungdómsbókmentavirðisløn Útnorðurráðsins fyri Abbi og eg og abbi
2022 Í uppskoti til Barna- og ungdómsbókmentavirðisløn Norðurlandaráðsins fyri Abbi og eg og abbi
2021 Bronze MGIP Book Award fyri Abbi og eg og abbi
Ein loysn frá Sendistovuni
